आधारातमा ब्यूँझदा

कृष्णभक्त श्रेष्ठ

आधारातमा ब्यझे कुनै बेला भने
मानसिक र शारीरिक दुवै दृष्टिले
आफूलाई एक्लो पाउँछु
नित्तान्त एक्लो
सहनै नसकिने गरी एक्लो

अनि, कसैले केही नगरे पनि
निकै वाधा व्यवधान भएको अनुभव गर्छु

साधारणतया त्यस्तो बेला
गिलासमा उब्रेको
बासी रक्सी फेरि धोक्छु
भोलि बिहानैदेखि फलामे टाउको
सकीनसकी बाकी हिडनु पर्ने कुरा
राम्ररी थाह पाउँदा प।उँदै

जाँगर चले नयाँ केही कोर्न बस्छु
नभए पुरानो अधुरो कुनै पूरा गर्न खोज्छु

कारण/अकारण
सामान्य कुरा
असहज र असामान्य भयो भने
अस्वाभाविक परिणाम निस्कँदो रहेछ

त्यस्तो बेला
कसैको भजन नगाउँने
आराधना नगर्ने मान्छले
या त केही सिर्जना गर्न लागिपर्छ
नभए
जानी जानी
कत्ति आनाकानी नगरी
आफैंलाई अधिकतम् हानी पुर्‍याउँछ ।