आजको मान्छे

भुवन त्रिपाठी


माथि-माथि आकाशमा कुहिरो लागेको छ
डाँडै-डाँडा छाँया बोकि घाम भागेको छ
माया बोक्ने मुटु भयो ढुङ्गा भन्दा साह्रो
सोझा-साझा नेपालीलाई भयो बाँच्नै गाह्रो

एकताको कुरा सबै कथा जस्तो लाग्छ
सत्य बोल्ने मुखहरू आफै आफै थाक्छ
स्वार्थभित्र मान्छे भए अन्धा बहिरा आज
जसले खोसी खान सक्छ उसकै भयो राज

पुर्खाहरूको गौरवमय वीरताको कथा
आज भयो अन्याय र अशान्तिको व्यथा
मान्छे आफै घाइते भयो आफ्नै प्रहारले
वेवारिसे भयो एक्लै बाँच्ने रहरले ।।

--
शीतल मार्ग
काठमाडौ