नयाँ घाउ नै लेख्नू

पुर्णविराम


बाढी र खडेरीको कुरा लेख्नू
त्यहाँबाट सावधानीपूर्वक
मलाई स्वतन्त्र भएपछि प्राप्त हुने
मेरो साँझ खेर नजाने गरेर ।
लेख्नू धमिलो देखिए धमिलो लेख्नू
हलक्क बढिसकेको काढाले
कोतरिरहेको भए कोतरेकै वयान लेख्नू
केही फरक पर्दैन
मलाई घाउ हुने आशंका हटाएर
मेरो लागि नयाँ घाउ नै लेख्नू ।
जंगली फूलले घुम ओढेको भए
नढाँटीकनै ओढाउने मानिसको नाम लेख्नू
पुरानो टेबुलमा
दिउँसो लगाएको कपडा फुकालेर
मनपर्ने खामभित्रबाट
आफूले थन्काएको आँखा फुकालेर
म पढूँला तिम्रो चिठ्ठी
बिना झूल बितेको रातलाई बिर्सिएर ।
सावधानीपूर्वक लेख्नू
खलंगाले खोजेको भए पहार
बाटो बनाउँदा बनाउँदै
कसैको चुरा फुटेको भए
आशंका हटाएर लेख्नू मलाई घाउ हुने
बाटो बनाउँदा मरेको
त्यो महान् मान्छेको नाम
निःसंकोच लेख्नू
मेरो लागि नयाँ घाउ नै लेख्नू
सावधानीपूर्वक लेख्नू
हज्जारौँ आँखारू तरेर मलाई प्राप्त हुन्छ चिठ्ठी ।